掉支筆過海

掉支筆過海


【明報專訊】各位老細，請睇「草泥馬」呢三個字，有乜唔妥？


如果，用粵音讀，擔保人人聲大大，不過，一轉以「煲冬瓜」讀呢？就個個口啞啞，好似讀完要處死咁！


究竟，關「草泥馬」三字字形事？定係字義？抑或字音呢？


同一道理，廣東東莞石碣鎮袁崇煥紀念碑，下邊銅牌刻住「掉哪媽！頂硬上！」六字，最近，畀當地「領導」飭令鑿走；香港報章報道時，竟將原裝碑文箇個「掉」字，打格仔，矇查查；更經典係有一份大報，居然裁走個「掉」字，出街圖片得番「哪媽！頂硬上！」五字，斬頭示眾。內文則用個「Ｘ」代替！


大佬！驚乜呀？咁慄！點出行傳媒呀？唔係話要如實報道咩？


「掉哪媽」唔得，咁「操你媽」、「幹你娘」又如何？甚或「去你的」又怎辦？關字形、字義、定字音事呢？請問！


假如，煲呔調林公公阿媽過海，入大帥府，專責調理鹵味，煲大檸樂，咁點落筆呢？


瓜三百八十年明末大將袁崇煥，力抵後金（即前清）兵攻，用「掉哪媽！頂硬上！」一詞激勵士卒死守，終於捱過了關，解困兼紮職，這也是佢個石像紀念碑下刻鑄箇六個原由典故，咁「救國宣言」，極有愛國教育價值名句，唔好好保存同弘揚，仲要剷平於無形，唔畀人挑那一聲，就有鬼！


早前，廣州巿政府透過政協網站，向巿民查詢多用普通話廣播意見，話藉此適應將來亞運會，同埋打造廣州成為國際大都會喎！旋即引起廣州人奮起反抗，直指中央立心殲滅粵方言，搞出一場廣東話捍衛戰！


打壓粵方言招數


究竟，中國政府歷來點打壓粵方言呢？


先睇睇中國近代歷史——最憎南方方言人，應該算係紫禁城內清朝皇帝。雍正不滿福建佬跟廣東人結義，組成天地會反清復明，於是用「鄉音不可通曉」為由，於雍正六年（一七二八年）下令禁止兩省人「習為鄉音」，更命令督撫設立正音書院以「正」之！「正音」者，係用《康熙字典》及《音韻闡微》二書作準，即以中州音為正音，但，直至雍正駕崩瓜老襯，都仍未能遏止閩粵土話鄉音。


到咸豐皇帝就更弊，粵人李文茂咸豐四年（一八五四年），率領紅船弟子加盟太平軍起義，到廣西自封為王，對抗清廷，就係咁！朝廷下令，焚佛山瓊花會館，禁演粵劇，違者斬，搞到粵劇受到空前打壓，瀕臨滅亡。由於太平天國天王洪秀全係廣東人，連詔書都係用廣東話寫成，所以粵語就係太平天國「國語」。


！唔好睇輕語言政治力量，太平軍老早便明白清廷利用「正音」「統治」漢人，所以，佢提出《奉天討胡檄布四方諭》﹕「中國有中國的語言，今滿洲造為京腔，更中國音，是欲以胡言語惑中國也！」


透過語言，爭取民心，團結民族意識，係鬥爭手段。


不要以為只有外族（清滿州人），才會用語言作為政治工具，藉「語言統一」分隔漢人各群族的結連，有利統治，原來，咱們中國人亦好呢味。一九一一年，中華民國成立後，翌年，召開「讀音統一會」，提選國語，及制定消滅方言政策；原先，「南京官話」勝出，後覺得其雜音繁重，遂改用北平話做國語。坊間傳說粵語比北平話少一票而落選，乃臨時大總統孫中山為了顧全大局，棄母語、投北話之故，其實，呢個講法不正確，因一九一二年，莊，係袁世凱，孫中山無份投票！


到一九三六年，國民政府更頒令禁拍、禁映粵語電影，此粗暴舉措，本是作消滅方言試金石，幸好，當時大部粵分語片香港拍攝，影響有限，跟住，三七年抗日戰爭爆發，國語統一籌備委員會工作亦陷於停頓，「國語統一」呢個口號才無人理會，殲滅方言亦無人執行！


「想殲滅方言，


一萬年都唔使旨意」


中共執政後，深信馬克思那套集權理論，話統一語言，就可統一世界。


一九五八年，中央政府提倡普通話教學，到六○年全面取消各地母語教學，目的顯而易見，用溫水煮蛙，死都唔知乜事！


與此同時，佢廣東推出廣州話方案，唔准粵語方言有關出版，箇陣，研究粵語，只得香港、澳門同美加；及因為大陸封關，留番香港呢個對外窗口，無端端令廣東話自由發展，隨住大眾娛樂文化，「流亡」海外，更顯光芒。


八十年代後，中國改革開放，中央政策轉用懷柔手段治國，內地那本《方言》雜誌復刊，每省都有方言學會成立，研究方言，算係中興好現象，普通話亦有粵語化，例如北語「許多」、「很多」會講為「好多」，連溫家寶總理都話「唱衰」，表面看來，河水不犯井水，求大同、存大異，大家和諧生活咪好囉！反正，方言，唔打都自動流失啦！返學考試要用普通話，仲邊有人有癮研究本地方言！最串上海，新一代咪逐漸不懂講滬語土話！阿公點會唔明？家陣突然玩針對，搞小動作，理由很簡單，就係有人利用語言作政治工具（騷出得政協牌頭，唔慌會無緣無故）推行對弈大比併！是否反映大陸內政不穩，內鬥不斷，暗湧滔天呢？！


五四時期文字改革先鋒，胡適曾力言話﹕想殲滅方言，一萬年都唔使旨意。


方言土語，同風俗習慣一樣，乃維繫一個地方宗族核心價值，不容冒犯，捍衛自己宗族文化，猶如保衛國土之重要，神性不可侵犯，如果，有人唔知地（音「訂」），玩大，咁唔係國民之損失，國家的悲哀！而係，掉你支筆過海啦！


文 彭志銘