南非世界盃﹕點先叫好波

南非世界盃﹕點先叫好波


【明報專訊】今晚世界盃決賽，終極高潮過後係無盡空虛，前幾日無波睇，失落感提前來到，鬱悶。


好彩有一班朋友瘋狂論戰，令我重新回味、反思成個世界盃樂與怒。


先睇下佢對西班牙戰德國的4強論戰幾咁激烈，


似足南北韓鴨綠江駁火同埋台海金門炮戰﹕


「德國係輸，雖敗猶榮，咁即係代表西班牙贏得唔光彩！你竟然支持埋咁無品的球隊，要積陰德呀！」


「唔似得你隊德國囉，盡晒力、又紅黃牌齊，連續兩屆只可以爭季軍，真係嗚呼哀哉！」


「德國荷蘭至少有一兩場代表作。西班牙除了贏智利的上半場外，沒好睇代表作，此乃本人最不服之處。」


「西班牙可能鍾意『搓波』多過『入波』，入球最少贏冠軍，能否叫『最渣』或最失敗冠軍？』


「咁都叫恥辱、失敗？真係無法認同球盲的觀點！」


世界盃可能促進非洲團結，但肯定促成香港球迷大分裂。


Facebook、討論區一個月來不停開火互轟，識唔識，都駁一輪火先過癮。


資深球迷爭論愛隊實力、戰術，僵持不下；趁熱鬧新丁，都各找所好，狂撐到底。


有人一生只愛英格蘭，有人死撐阿根廷無敵，有人唾罵巴西背叛森巴，有人恥笑法國醜陋，有人鋤強扶弱捧新西蘭，有人跟紅頂白追德國，有人高舉華麗進攻大旗，有人追逐實用功利……


上網睇高登討論區，我發現戰仲慘烈﹕「今晚丹麥輸，我XXX放落滾油炸！」「西班牙贏到，我XX！」「巴西贏，我就XXXX！」「希臘入唔到一粒，我XX！」「英格蘭出局，我XX煲湯！」一時間，哀鴻遍野，血流成河，欠周街「J數」（潮語，請上網自行查找本義）者不計其數。


西班牙踢爭氣波贏德國


香港人太忙，唔似外國每逢周末全家入場捧愛隊，所以好多人到世界盃先趁熱鬧，唔識睇波，慘被稱為球盲。但盲其實唔緊要，邊個話睇書個個都要識寫小說？我都唔係好識，所以成日「賴」，馬會爭我條婆數，都係先還清，好慘。不過，睇波真係可以學，只要平靜理智咁去學，盲都遲早開眼。我唔敢話教大家睇波，但就西班牙戰德國講，做個引子，有時睇波，唔係學特首「狗up」就可以講贏人﹕


呢戰，係一場勝敗雙方都絕對可以昂起頭行出球場準經典戰役。話西班牙唔華麗，真係唔公道，如果玩5區公投，九成人會投「華麗」一票。睇各國體育新聞，全世界著名將帥無人唔服西班牙，除想煮章魚班食客，征服指數接近百分百。


鬥牛佬前幾場係踢得差，但如果話西班牙只有對智利上半場係好波，就真係錯。有朋友今年先開始睇波，亦可能係我成見，但其實半場係西班牙踢得最糟糕時候，亦係鬥牛佬本屆最危險半場，比對德國危險得多。西班牙入智利兩粒，但數字無意思，第一球係對方龍門發瘟送禮，然後智利紅牌打少個。鬥牛佬未收到禮物前，被攻到半場都過唔到。我睇20年波，未見過，場面誇張過06年被施丹法國踐踏。所以話，話西班牙樣衰，對智利呢場係200%成立！對德國之前，西班牙只有15分鐘好波，就係對巴拉圭下半場末段，變陣451。


精彩防守也好看


西班牙頭幾場，我都睇到「R頭」。咁叫歐洲冠軍？咪玩啦老友！但如果話鬥牛佬對日耳曼打得防守兼醜陋，證明你未懂得點欣賞足球。我想講，防守原來有好多種﹕


一）「901」縮


龍門之外9個球員徹底死守，men behind ball，接近零中場，留番一個前鋒對方前場盡人事撩下撩下。朝鮮、希臘案例


二）防守反擊


防守時中場線全部後撤，攔截得球後約2至4人發動快速反擊，但要保證自己後場有至少留有4、5人鎮守，以免對方反搶反攻。瑞士、巴西、荷蘭案例


三）前場壓迫


全隊用體力、積極奔跑去主動逼搶，核心防線實質推到中場，甚至前場2、3個前鋒都要逼對方控球後衛，增加對方犯錯機會。一搶到，就地發起快攻，唔好gas打迂迴組織。巴拉圭對西班牙案例


四）以攻代守


狂攻，爛攻，搏命攻！皮球永遠在對方半場踢，唔畀對方有喘息反擊機會，所以有所謂「進攻就係最佳防守」，呢種謂之普遍人認識「華麗」足球，狂野好睇，但個人技術、走位、視野、傳接球，都有好高要求。舊時巴西案例、今屆智利案例、朝鮮慘死反例、90年巴西滑鐵盧慘例，94、00年（歐國盃）荷蘭含淚恨例


五）中場控球


另一種以攻代守，但核心在中場控球消耗對方體力，永遠掌握主動權，「馬騮搶波」搓到你暈，左到右，前到後，慢慢搵空隙煮死你。08年（歐國盃）西班牙案例、今年西班牙先失敗後成功案例、02年巴西贏英格蘭案例、舊時巴西案例


六）攻守割裂


前面鋒線攻到飽，後面條防線唔該你後衛自己守。靠球員各自發揮，打天才波，街場常用。今屆阿根廷案例，所有無隊形球隊都係案例。


咁多種防守方式，其實絕大部分都要攻守結合。隊波有乜類型球員，就揀唔同踢法，唔通叫朝鮮同巴西對攻咩？對乜球隊，都可以選擇唔同陣法。


你可以話縮、防反係防守，但勿忘記防守係進攻前提、前奏，守唔掂，有時間都要去龍門執番個波先啦，邊得閒進攻？


你都可以話前場緊逼、瘋狂進攻、控球入楔都係防守。因為掌握主動，控球在腳，令後防壓力大減，後衛仲得閒上助攻抽水，所以話係一種提前防守，係另一境界防守。你話喇，對波係防守定華麗，球迷為乜要搞到炮戰？攻可以攻到自己漏洞百出，守可以守到對方滴水不漏。


本屆好睇球賽


瑞士無進攻天才，被迫選擇悶死西班牙守住，一招反擊得手。我話好睇！有紀律美。


智利冒死狂攻西班牙，出師未捷身先死，但全世界跌爛眼鏡。我話非常好睇！係亮麗美、悲壯美。


阿根廷前場狂攻，前鋒輪流個人表演。我話好睇！叫個人技術美。


喀麥隆狂攻，丹麥唔赦你對攻，又打埋防反，成就本屆最精彩賽事之一。真係非常好睇！叫做過癮美！


荷蘭打防反，一世夠運，又靠中場好狡猾，而且恰到好處唔紅牌犯規。都有人話好睇！話咁叫實用美。


巴西都打防反，演繹得最完美，可惜輸心理質素。前場3個夠玩死你6個，後衛得閒上抽水，又一粒。我都話好睇！森巴佬話係效率美，對手就覺得係無奈美！


所以話，華麗與醜陋，消極定進取，可能容易定義，但每個打法去到高境界，都可以好睇。我唔敢教大家睇波，係想大家平心靜氣欣賞球賽，睇清楚變幻細節。雖然荷蘭無厘頭贏巴西場，我都忍唔住，做唔到。但一味無原因咁死撐愛隊天下無敵，踩到對面廢柴爛泥，只會失去欣賞足球精華機會。


無波在腳都可以好波


一個前鋒點解叫好波？唔係淨係射門靚，試睇埋無波在腳，佢點解係咁走位；一個中場係咁中圈傳來傳去好悶？留意下點解所有球員都睇佢頭走位，佢無貨交，隊波可能好快就被人住砌；一個後衛點解叫頂級？唔係頂頭槌入波做鏡頭英雄咁簡單，睇下對方中場發起進攻時，佢企對方前鋒附近乜位置，點解要選條路線回防。


今年被足球上帝感召新球迷，可以先留意球員個人，然後再睇球隊整體，點互相補位防守，換位進攻，唔好齋睇比數（西班牙德國0比0上半場，兩隊都好好睇！），唔係入波多就係無敵，入得少就係等收皮。你慢慢會發現前鋒多未必攻力強，控球多唔代表有威脅，鬥牛佬對弱隊打442幾乎要輸，對德國佬打451竟然住砌。


有人將球迷分成理性同盲目，初時覺得梗係盲目最傻仔，但咀嚼朋友呢句「睇波唔捧波，睇來做什麼？」之後，我發現太理性真係會無得享受與愛隊同喜同悲激情，呢樣，係世界盃核心價值之一，比中環價值理所當然得多。所以話，死忠球迷無論愛隊幾差都捧足隊幾十年，好值得尊敬。新球迷搵隊心水去長追，係欣賞足球開始，值得我球癡高興。


捧心水隊是欣賞足球開始


我明白係人見到愛隊輸波都會有脾氣，但記得欣賞球賽過程，承認自己不足，欣賞對手高超，先係真正球迷。人踢得好贏波，就唔理表現踩對家廢柴，種叫做球盲。信我，放低無厘頭執著睇今晚決賽，你會睇得開心好鬼多。你同朋友吹水講波時，甚至會發現大家對某種足球風格喜愛，可能同對某些政治理念堅持原來係咁相似，咁有共鳴﹕


「而家巴西基本上只靠前面3個打反擊就夠贏，間中加一個馬爾干、巴斯圖斯或者拉美利斯是但一個上抽水又搞掂！」


「可惜呢隊已經唔係森巴足球。」


「近幾屆世界盃有無咁有效率防守反擊？」


「真係冇，以前意大利同家德國反擊都唔夠佢巔峰。」


「巴西班友禁區頂散出反擊下，真係好恐怖！」


「無錯，但我已經唔鍾意呢隊巴西喇。」


「同民主黨一樣，或者路線可取，但面容扭曲。」


「你諗下連羅賓奴都唔肯堅持插花畀我睇，咁同劉慧卿走去同班叫佢街人歡笑握手有咩分別？」


「我家終於明白，細哨巴西隊點解完全無位企！」


「因為鄧加就係何俊仁，頂住全巴西長毛謾罵，推出政改防守反擊保守方案。」


「咁細哨唯有退黨啦，做鄭家富囉。講句﹕呢隊已經唔係我所認識巴西！」


文 燈神．茂斯


編輯 楊泳森